ଇତିହାସ ରଚିଲେ ସିଜେଆଇ ଚନ୍ଦ୍ରଚୁଡ

ନୂଆଦିଲ୍ଲୀ,୪।୫: ଭାରତର ପ୍ରଧାନ ବିଚାରପତି ଡି. ଓ୍ବାଇ. ଚନ୍ଦ୍ରଚୂଡ ପୁଣି ଥରେ ଚର୍ଚ୍ଚାକୁ ଆସିଛନ୍ତି। ସେ ତାଙ୍କ ନାମରେ ଏକ ରେକର୍ଡ କରିଛନ୍ତି ଯାହା ଏପର୍ଯ୍ୟନ୍ତ କେହି ସିଜେଆଇ କରିନାହାଁନ୍ତ। ଅବଶ୍ୟ, ଏଥର ଏହାର କାରଣ କୌଣସି ରାୟ ନୁହେଁ, ବରଂ ତାଙ୍କର ଏକ ଯାତ୍ରା । ଘଟଣାହେଲା ସିଜେଆଇ ତିନି ଦିନିଆ ସରକାରୀ ଗସ୍ତରେ ଶୁକ୍ରବାର (୩ ମଇ ୨୦୨୪) ନେପାଳରେ ପହଞ୍ଚିଥିଲେ।
ଭାରତର କୌଣସି ସିଟିଂ ପ୍ରଧାନ ବିଚାରପତିଙ୍କ ଦ୍ୱାରା ଏହା ନେପାଳର ପ୍ରଥମ ଗସ୍ତ। ତାଙ୍କ ଗସ୍ତ ସମୟରେ ସେ ତାଙ୍କ ନେପାଳୀ ପ୍ରତିପକ୍ଷଙ୍କୁ ଭେଟିବେ ଏବଂ ଶିଶୁ ଅଧିକାର ଉପରେ ଏକ ସେମିନାରରେ ମଧ୍ୟ ସମ୍ବୋଧିତ କରିବେ। ନେପାଳର ପ୍ରଧାନ ବିଚାରପତି ବିଶ୍ୱଭାସ ପ୍ରସାଦ ଶ୍ରେଷ୍ଟାଙ୍କ ନିମନ୍ତ୍ରଣ କ୍ରମେ ଏଠାକୁ ଆସିଥିବା ଜଷ୍ଟିସ ଚନ୍ଦ୍ରଚୁଡଙ୍କୁ ତ୍ରିଭୁବନ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିବା ପରେ ନେପାଳ ସୁପ୍ରିମକୋର୍ଟର ବରିଷ୍ଠ ବିଚାରପତି ଡକ୍ଟର ଆନନ୍ଦ ମୋହନ ଭଟ୍ଟରାଇ ସ୍ବାଗତ କରିଥିଲେ।

ନେପାଳ ସୁପ୍ରିମକୋର୍ଟର ମୁଖପାତ୍ର ବେଦ ପ୍ରସାଦ ଉପ୍ରେତିଙ୍କ ଅନୁଯାୟୀ, ଇତିହାସରେ ଏହା ପ୍ରଥମ ଥର ପାଇଁ ଭାରତର ଜଣେ ସିଟିଂ ପ୍ରଧାନ ବିଚାରପତି ନେପାଳ ଗସ୍ତରେ ଆସିଛନ୍ତି। ଶନିବାର (୪ମେ’ ୨୦୨୪) କାଠମାଣ୍ଡୁରେ କେନ୍ଦ୍ରୀୟ ଶିଶୁ ନ୍ୟାୟ କମିଟି ଦ୍ୱାରା ଆୟୋଜିତ ହେବାକୁ ଥିବା ଶିଶୁ ଅଧିକାର ଉପରେ ଜାତୀୟ ସେମିନାରରେ ଚନ୍ଦ୍ରଚୁଡ ମୁଖ୍ୟ ବକ୍ତା ଭାବରେ ଯୋଗଦେବେ। ଏହି ସମୟ ମଧ୍ୟରେ ସେ ଅନେକ ଲୋକଙ୍କୁ ମଧ୍ୟ ଭେଟିବେ।
ଉପ୍ରେତିଙ୍କ ଅନୁଯାୟୀ ଜଷ୍ଟିସ ଚନ୍ଦ୍ରଚୂଡ ସେହି ଦିନ ସାରେ ନେପାଳର ପ୍ରଧାନ ବିଚାରପତିଙ୍କ ସହ ଏକ ବନ୍ଧୁତ୍ୱପୂର୍ଣ୍ଣ ବୈଠକ କରିବେ। ସେ କହିଛନ୍ତି ଯେ ଜଷ୍ଟିସ ଶ୍ରେଷ୍ଟା ତାଙ୍କ ଭାରତୀୟ ପ୍ରତିପକ୍ଷଙ୍କ ସମ୍ମାନାର୍ଥେ ଏକ ରାତ୍ରୀ ଭୋଜନ ମଧ୍ୟ କରିବେ। ଜଷ୍ଟିସ ଚନ୍ଦ୍ରଚୂଡଙ୍କ ଏହି ସରକାରୀ ଗସ୍ତ ରବିବାର ଶେଷ ହେବ।
ସୂଚନାଯୋଗ୍ୟ, ନଭେମ୍ବର ୨୦୨୩ରେ ନେପାଳର ଦୁଇଜଣ ବିଚାରପତି ସିଜେଆଇ ଚନ୍ଦ୍ରଚୁଡଙ୍କ କୋର୍ଟ ପ୍ରକ୍ରିୟା ଦେଖିବା ପାଇଁ ଭାରତ ଆସିଥିଲେ। ଏହି ସମୟରେ ଚନ୍ଦ୍ରଚୂଡ କହିଥିଲେ ଯେ ମୁଁ ଆମର ବେଞ୍ଚରେ ଦୁଇଜଣ ବିଶିଷ୍ଟ ବିଚାରପତିଙ୍କୁ ସ୍ବାଗତ କରୁଛି। ଏହି ସମୟ ମଧ୍ୟରେ ସିଜେଆଇ ମଧ୍ୟ ଘୋଷଣା କରିଥିଲା ଯେ ସେମାନେ ଖୁବ ଶୀଘ୍ର ଭାରତ-ନେପାଳ ବିନିମୟ କାର୍ଯ୍ୟକ୍ରମ ଆୟୋଜନ କରିବାକୁ ଯାଉଛନ୍ତି।

The post ଇତିହାସ ରଚିଲେ ସିଜେଆଇ ଚନ୍ଦ୍ରଚୁଡ appeared first on Dharitri Odia News.