କାନାଡାରେ ଭାରତୀୟ ବଂଶୋଦ୍ଭବଙ୍କୁ ହତ୍ୟା, ସୋସିଆଲ ମିଡ଼ିଆରେ ଗୁହାରି କଲେ ଝିଅ

ଟରଣ୍ଟୋ,୧୭।୫: ୫୧ ବର୍ଷୀୟ କାନାଡିୟ ବ୍ୟବସାୟୀ ହରଜିତ ସିଂହ ଧଡ୍ଡାଙ୍କୁ ମିସିସାଗାରେ ଗୁଳି କରି ହତ୍ୟା କରାଯାଇଛି। ଡିକ୍ସନ ଏବଂ ହେରି ରୋଡ ନିକଟରେ ଟେଲଫୋର୍ଡ ୱେରେ ଅପରାଧୀମାନେ ଧଡ୍ଡାଙ୍କୁ ଗୁଳି କରିଥିଲେ ଏବଂ ଡାକ୍ତରଖାନାରେ ତାଙ୍କୁ ମୃତ ଘୋଷଣା କରିଥିଲେ। ତାଙ୍କ ଝିଅ ଗୁରଲୀନ ଧଡ୍ଡା ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ଏକ ପୋଷ୍ଟ ଶେୟାର କରି ଏହି ବିଷୟରେ ସୂଚନା ଦେଇଛନ୍ତି।
ସେ ସୋସିଆଲ ମିଡିଆରେ ଲେଖିଛନ୍ତି ଯେ ମୋର ନାମ ଗୁରଲୀନ ଧଡ୍ଡା। ମୁଁ ହରଜିତ ସିଂହ ଧଡ୍ଡାଙ୍କ ଝିଅ ଏବଂ ମୁଁ ମୋ ବାପାଙ୍କ ପାଇଁ ନ୍ୟାୟ ଚାହୁଁଛି। ମୁଁ ଏହି ବ୍ୟବସ୍ଥାରେ ହାରିଯାଇଥିବା ପ୍ରତ୍ୟେକ ପରିବାର ପାଇଁ ନ୍ୟାୟ ଚାହୁଁଛି। ସେ ଆହୁରି ଲେଖିଛନ୍ତି ଯେ ଏହି ଘଟଣା ମୋ ପରିବାର ଏବଂ ସମଗ୍ର ସମାଜକୁ ଦୋହଲାଇ ଦେଇଛି।
‘ଆମେ ସୁରକ୍ଷା ପାଇଁ ପୋଲିସକୁ ବାରମ୍ବାର ନିବେଦନ କରୁଥିଲୁ’
ଗୁରଲୀନ ଧଡ୍ଡା କହିଛନ୍ତି ଯେ ଗତ କିଛି ବର୍ଷ ଧରି ମୋ ବାପାଙ୍କୁ ଧମକ ମିଳୁଥିଲା। ଆମେ ଏପ୍ରିଲ ୨୦୨୩ରେ ଏକ ସମ୍ଭାବ୍ୟ ଆକ୍ରମଣର ସମ୍ମୁଖୀନ ହୋଇଥିଲୁ। ଆମେ ଏ ବିଷୟରେ ପୋଲିସକୁ ଜଣାଇଥିଲୁ ଏବଂ ଆମ ସୁରକ୍ଷା ପାଇଁ ସେମାନଙ୍କୁ ନିବେଦନ କରିଥିଲୁ, କିନ୍ତୁ ସେମାନଙ୍କଠାରୁ ଆମକୁ କୌଣସି ସାହାଯ୍ୟ ମିଳିଲା ନାହିଁ। କାନାଡିୟ ପୋଲିସ ଆମକୁ ସୁରକ୍ଷା ଦେବାରେ ବିଫଳ ହେଲା। ସେ କହିଛନ୍ତି ଯେ ଆକ୍ରମଣ ବିଷୟରେ ସୂଚନା ଦେବା ପରେ ମଧ୍ୟ ଆମକୁ କୌଣସି ସୁରକ୍ଷା ଯୋଗାଇ ଦିଆଯାଇ ନଥିଲା। ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲା। ଏହି କାରଣରୁ ଜଣେ ନିର୍ଦ୍ଦୋଷ ବ୍ୟକ୍ତି ନିଜ ଜୀବନ ହରାଇଲେ।

The post କାନାଡାରେ ଭାରତୀୟ ବଂଶୋଦ୍ଭବଙ୍କୁ ହତ୍ୟା, ସୋସିଆଲ ମିଡ଼ିଆରେ ଗୁହାରି କଲେ ଝିଅ appeared first on Dharitri Odia News.