ବ୍ରହ୍ମୋସ ଭୟରେ ଏବେ ବି ଥରୁଛି ପାକିସ୍ତାନ: ଭାରତର ବନ୍ଧୁକୁ ମାଗିଲା ସାହାଯ୍ୟ

ନୂଆଦିଲ୍ଲୀ,୧୦।୬: ଅପରେଶନ ସିନ୍ଦୂର ସମୟରେ ପାକିସ୍ତାନକୁ ବହୁତ କ୍ଷତି ସହିବାକୁ ପଡିଥିଲା। ଭାରତର ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ସମୟରେ ଏହାର ଅନେକ ବାୟୁସେନା ଘାଟି ନଷ୍ଟ ହୋଇଯାଇଥିଲା। ପାକିସ୍ତାନ ଏପର୍ଯ୍ୟନ୍ତ ଏହାକୁ ଭୁଲିନାହିଁ। ଏବେ ସେ ସାହାଯ୍ୟ ପାଇଁ ପର ଦୁଆର ଠକ ଠକ କରୁଛି। ଏହା ଅନ୍ୟ ଦେଶରୁ ସାହାଯ୍ୟ ପାଇଁ ନିବେଦନ କରୁଛି। ଏକ ରିପୋର୍ଟରେ ଦାବି କରାଯାଇଛି, ପାକିସ୍ତାନ ତାର ବାୟୁ ପ୍ରତିରକ୍ଷା ବ୍ୟବସ୍ଥାକୁ ମଜଭୁତ କରିବାକୁ ଚାହୁଁଛି ଏବଂ ଏଥିପାଇଁ ସେ ଜର୍ମାନୀ ଏବଂ ଇଟାଲୀରୁ ସାହାଯ୍ୟ ଆଶା କରୁଛି।

ଭାରତର ବ୍ରହ୍ମୋସ କ୍ଷେପଣାସ୍ତ୍ର ପାକିସ୍ତାନକୁ ବହୁତ କ୍ଷତି ପହଞ୍ଚାଇଥିଲା। ଏହାର ଚାଇନା ବାୟୁ ପ୍ରତିରକ୍ଷା ବ୍ୟବସ୍ଥା ଭାରତର ଆକ୍ରମଣକୁ ରୋକିବାରେ ବିଫଳ ପ୍ରମାଣିତ ହୋଇଛି। ବ୍ରହ୍ମୋସ ଯୋଗୁ ପାକିସ୍ତାନ ସେନା ଟେନ୍‌ସନ୍‌ରେ ଅଛି। ରିପୋର୍ଟରେ ଦାବି କରାଯାଇଛି ଯେ, ପାକିସ୍ତାନ ଜର୍ମାନୀର IRIS-T ଏବଂ ଇଟାଲୀର CAMM-ER ଉପରେ ନଜର ରଖିଛି। ପାକିସ୍ତାନ ଜର୍ମାନୀର ବାୟୁ ପ୍ରତିରକ୍ଷା ବ୍ୟବସ୍ଥା IRIS-T ବାଛିପାରିବ। ଏହା ନିକଟରେ ୟୁକ୍ରେନରେ ନିଜର କ୍ଷମତା ପ୍ରମାଣିତ କରିଛି।

ପାକିସ୍ତାନ ଜର୍ମାନୀର IRIS-T ପ୍ରତି ଅଧିକ ଆଗ୍ରହ ଦେଖାଉଛି। ଜର୍ମାନୀର ବାୟୁ ପ୍ରତିରକ୍ଷା ବ୍ୟବସ୍ଥା ବ୍ରହ୍ମୋସ ଭଳି ସୁପରସୋନିକ ମିଶାଇଲ୍‌କୁ ରୋକିବାର କ୍ଷମତା ରଖିଛି। ଅନ୍ୟପକ୍ଷରେ, ଇଟାଲୀର ପ୍ରତିରକ୍ଷା ପ୍ରଣାଳୀର ପରିସର ଏବଂ ପ୍ରତିରୋଧ ଗତି ବ୍ରହ୍ମୋସ ତୁଳନାରେ ବହୁତ କମ। ତେଣୁ, ଏହା ଜର୍ମାନୀ ଆଡ଼କୁ ଅଧିକ ଢଳୁଛି।

ଜର୍ମାନୀର ବାୟୁ ପ୍ରତିରକ୍ଷା ପ୍ରଣାଳୀ IRIS-T ବିଷୟରେ କହିବାକୁ ଗଲେ, ଏହା ମଧ୍ୟମ ପରିସର ସହିତ ଆସିଥାଏ। ଏହା ପ୍ରାୟ ୪୦ କିଲୋମିଟର ପର୍ଯ୍ୟନ୍ତ ପରିସର ପ୍ରଦାନ କରେ ଏବଂ ୨୦ କିଲୋମିଟର ପର୍ଯ୍ୟନ୍ତ ଉଚ୍ଚତାରେ ଲକ୍ଷ୍ୟସ୍ଥଳକୁ ସହଜରେ ଆକ୍ରମଣ କରିପାରିବ। ଏହା ଡ୍ରୋନ ଏବଂ କ୍ରୁଜ ମିଶାଇଲ୍‌ ବିରୋଧରେ ବହୁତ ପ୍ରଭାବଶାଳୀ ପ୍ରମାଣିତ ହୋଇପାରେ।

ୟୁକ୍ରେନ ଏବଂ ରୁଷିଆ ମଧ୍ୟରେ ଯୁଦ୍ଧ ସମୟରେ IRIS-T ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଏହା ରୁଷିଆର ପ୍ରାୟ ୬୦ଟି କ୍ଷେପଣାସ୍ତ୍ର ଏବଂ ଡ୍ରୋନକୁ ପ୍ରତିରୋଧ କରିଥିଲା। ଏଥିରେ P-800 Onyx ମଧ୍ୟ ଅନ୍ତର୍ଭୁକ୍ତ। ଏହି ମିଶାଇଲ୍‌ ବୈଷୟିକ ଭାବରେ ବ୍ରହ୍ମୋସ ସହିତ ସମାନ। ଏହି କାରଣରୁ ପାକିସ୍ତାନ ଏହି ବାୟୁ ପ୍ରତିରକ୍ଷା ପ୍ରତି ଅଧିକ ଆଗ୍ରହ ଦେଖାଉଛି।

The post ବ୍ରହ୍ମୋସ ଭୟରେ ଏବେ ବି ଥରୁଛି ପାକିସ୍ତାନ: ଭାରତର ବନ୍ଧୁକୁ ମାଗିଲା ସାହାଯ୍ୟ appeared first on Dharitri Odia News.