ସୁନା ଚୋରା ଚାଲାଣ ମାମଲା: ଅଭିନେତ୍ରୀ ରଣ୍ୟା ରାଓଙ୍କୁ ୧ବର୍ଷ ଜେଲ୍ ଦଣ୍ଡ

ସୁନା ଚୋରା ଚାଲାଣ ମାମଲାରେ କନ୍ନଡ ଅଭିନେତ୍ରୀ ରଣ୍ୟା ରାଓଙ୍କୁ ଗୋଟିଏ ବର୍ଷ ଜେଲ ଦଣ୍ଡ ଦିଆଯାଇଛି । ଏହି ନିର୍ଦ୍ଦେଶ ବିଦେଶୀ ମୁଦ୍ରା ସଂରକ୍ଷଣ ଏବଂ ଚୋରାଚାଲାଣ ନିବାରଣ ଆଇନ (COFEPOSA) ପରାମର୍ଶଦାତା ବୋର୍ଡ ଦ୍ୱାରା ପାସ କରାଯାଇଛି, ଯେଉଁଥିରେ ରଣ୍ୟା ରାଓଙ୍କ ସହିତ ଅନ୍ୟ ଦୁଇ ଅଭିଯୁକ୍ତ ମଧ୍ୟ ସାମିଲ୍ । ନିର୍ଦ୍ଦେଶ ଅନୁଯାୟୀ, ଏକ ବର୍ଷର ଜେଲଦଣ୍ଡ ଅବଧି ମଧ୍ୟରେ ତିନି ଜଣଙ୍କୁ ଜାମିନ ପାଇଁ ଆବେଦନ କରିବାର ଅଧିକାରରୁ ବଞ୍ଚିତ କରାଯାଇଛି । ଅର୍ଥାତ୍, ସମ୍ପୂର୍ଣ୍ଣ ଦଣ୍ଡାଦେଶ ମଧ୍ୟରେ ସେମାନଙ୍କ ମଧ୍ୟରୁ କେହି ଜାମିନ ପାଇଁ ଆବେଦନ କରିପାରିବେ ନାହିଁ ।

କନ୍ନଡ ସୁପରଷ୍ଟାର ସୁଦୀପଙ୍କ ସହ ‘ମାଣିକ୍ୟ’ ଚଳଚ୍ଚିତ୍ରରେ ଅଭିନୟ ପାଇଁ ରଣ୍ୟା ଜଣାଶୁଣା । ସେ ଅନ୍ୟାନ୍ୟ ଦକ୍ଷିଣ ଭାରତୀୟ ଚଳଚ୍ଚିତ୍ରରେ ମଧ୍ୟ କାମ କରିଛନ୍ତି । ଚଳିତ ବର୍ଷ ମାର୍ଚ୍ଚ ୩ ତାରିଖରେ ବେଙ୍ଗାଲୁରୁର କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରେ ରଣ୍ୟା ରାଓଙ୍କୁ ୧୪.୮ କିଲୋ ସୁନା ସହିତ ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ (DRI) ଗିରଫ କରିଥିଲା । ତାଙ୍କର ବାରମ୍ବାର ଅନ୍ତର୍ଜାତୀୟ ଯାତ୍ରା ଯୋଗୁଁ ରଣ୍ୟା DRI ର ନଜରରେ ଥିଲେ । ୩ ମାର୍ଚ୍ଚ ରାତିରେ ସେ ଦୁବାଇରୁ ଏକ ଏମିରେଟ୍ସ ବିମାନରେ ବେଙ୍ଗାଲୁରୁ ଆସିଥିଲେ ଯେତେବେଳେ ତାଙ୍କୁ ଗିରଫ କରାଯାଇଥିଲା ।

ଏଥି ସହ ଜାଣିରଖନ୍ତୁ ଯେ, DRI ଅଧିକାରୀମାନେ କହିଥିଲେ ଯେ ଅଭିନେତ୍ରୀ ରଣ୍ୟା ରାଓ ତାଙ୍କ ଶରୀରରେ ଅଧିକାଂଶ ସୁନା ପିନ୍ଧିଥିଲେ, ଏବଂ ସେ ତାଙ୍କ ପୋଷାକରେ ସୁନା ବାର୍ ମଧ୍ୟ ଲୁଚାଇ ରଖିଥିଲେ । ରଣ୍ୟାଙ୍କ ସାବତ ବାପା ରାମଚନ୍ଦ୍ର ରାଓ ଜଣେ ବରିଷ୍ଠ ଆଇପିଏସ୍ ଅଧିକାରୀ । DRI କହିଛି ଯେ ବିମାନବନ୍ଦରରେ ପହଞ୍ଚିବା ପରେ ରଣ୍ୟା ନିଜକୁ ଜଣେ ଆଇପିଏସ୍ ଅଧିକାରୀଙ୍କ ଝିଅ ଭାବରେ ପରିଚୟ ଦେଉଥିଲେ ଏବଂ ତାଙ୍କୁ ଘରକୁ ଛାଡିବା ପାଇଁ ସ୍ଥାନୀୟ ପୋଲିସ କର୍ମଚାରୀଙ୍କୁ ମଧ୍ୟ ଡାକିଥିଲେ ।

ଇଡି ରଣ୍ୟା ରାଓଙ୍କ ବିରୋଧରେ ମନି ଲଣ୍ଡରିଂ ନିବାରଣ ଆଇନ (PMLA) ଅଧୀନରେ ଏକ ECIR ଦାୟର କରିଥିଲା । ଜୁଲାଇ ୪ ତାରିଖରେ ଇଡି ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ବେଙ୍ଗାଲୁରୁର ଭିକ୍ଟୋରିଆ ଲେଆଉଟରେ ଏକ ଘର, ବେଙ୍ଗାଲୁରୁର ଅର୍କାବତି ଲେଆଉଟରେ ଏକ ପ୍ଲଟ୍, ଟୁମକୁରରେ ଏକ ଶିଳ୍ପ ଜମି ଏବଂ ଅନେକଲ ତାଲୁକରେ କୃଷି ଜମି ଜବତ କରିଥିଲା । ଏହି ସମସ୍ତ ସମ୍ପତ୍ତିର ମୋଟ ମୂଲ୍ୟ ପ୍ରାୟ ୩୪.୧୨ କୋଟି ଟଙ୍କା ।

Also read : ଅନଲାଇନ ଟିକେଟ୍ ବୁକିଂର ଶିକାର ହେଲେ ଅର୍ଚ୍ଚନା ପୂରନ ସିଂ, ୟୁଟ୍ୟୁବ ବ୍ଲଗରେ ସେୟାର କଲେ ଅପଡେଟ୍

The post ସୁନା ଚୋରା ଚାଲାଣ ମାମଲା: ଅଭିନେତ୍ରୀ ରଣ୍ୟା ରାଓଙ୍କୁ ୧ବର୍ଷ ଜେଲ୍ ଦଣ୍ଡ appeared first on KNews Odisha.